محمد علي بن رمضان يودع الترجي برسالة مؤثرة

نشر منذ قليل محمد علي بن رمضان تدوينة على حسابه الرسمي على انستغرام أعلن فيها رسميا عن نهاية تجربته مع الترجي بعد توقيعه عقدا مع نادي فرانسفاروش المجري. وتوجه بن رمضان بالشكر لرئيس النادي حمدي المدب ولجماهير الفريق ولكل مدربيه متمنيا آت يكون مصدر فخر لكل المكشخين. وفيما يلي نص التدوينة:”لكل بداية نهاية و لكل قصة ختامها.
كذلك هي سنة الحياة و سنة الله في خلقه. اليوم أعلن عن نهاية رحلتي مع فريقي الأم الترجي الرياضي التونسي و في الحقيقة هي نهاية مرحلة كروية لأني سأبقى واحد من هذه العائلة الكبيرة البارح و اليوم و غدوة. لأنو ما وصلت للمستوى الي انا فيه كان بفضل ربي سبحانه في المقام الاول و كذلك بفضل الترجي الي كبرت فيه و تكونت فيه وعشت فيه قصة غرام و محبة ناس كبيرة تعلمت منها على جميع المستويات الرياضية و الأخلاقية و خاصة الانسانية.
يشهد الله انني عمري ما حسبت ولا قصرت و لا بخلت بجهد حتى لحظة على جمعيتي و ماهيش مزية خاطر ما يعمل مزية حد على عائلتو و الترجي مزاياها كبيرة و سابقة علينا.
صحيح اللحظة هاذي كنت خايف منها برشا خاطرها لحظة صعيبة عليا أما لازمني نشكر برشا عباد و هذا من أضعف الايمان.
نحب نشكر أولا و بالأخص سي حمدي المؤدب الي نعتبرو في مقام والدي. سي حمدي وقف معايا و نصحني و دعمني و آمن بيا وتفهم طموحاتي و مازال لليوم واقف مع الجمعية.
نحب نشكر أحسن و أقوى و أكبر جمهور في الكون، جمهور الترجي اللي يجيب أطراح وحدو، جمهور يدز معانا في كل وقت، جمهور كبرت معاه و غنيت معاه و ضربت عليه. انتم اكثر حاجة باش نفقدها و ربي يخليكم للترجي.
نحب نشكر كل واحد وقف معايا بالفعل الطيب و الكلمة الباهية ماللي دخلت للپارك و انا صغير.
نحب نشكر كل واحد شجعني و علمني و صلحني و دز معايا باش وصلت قائد فريق النادي العظيم هذا.
نحب نشكر جميع المدربين متاعي و نشكر عائلتي و اصحابي و الناس اللي تعبتها و صبرت معايا.
نغادر اليوم الترجي راسي الفوق. نغادر نحو أوروبا بش نعيش حلمتي و أسئل الله ان يوفقنا فيها لما فيه خير لنا.
في الاخير أتمنى ان اكون مصدر فخر للمكشخين و للتوانسة الكل طوال بقية المسيرة اللي باش يكتبهالي ربي.”

#محمد #علي #بن #رمضان #يودع #الترجي #برسالة #مؤثرة

تابعوا Tunisactus على Google News